Májilis tóraǵasy Erlan Qoshanov «Teńizshevroıl» JSHS bas dırektory Kevın Lıon bastaǵan delegasıany qabyldady. Delegasıa Astanaǵa depýtattardy kompanıa qyzmetimen tanystyryp, yntymaqtastyq máselelerin talqylaý úshin kelgen.

 Erlan Qoshanov «Teńizshevroıl» JSHS (TSHO) Qazaqstan ekonomıkasynyń damýyna zor úles qosyp kele jatqan jetekshi halyqaralyq kompanıa ekenin atap ótti. Onyń qurylǵanyna bıyl sáýir aıynda 30 jyl toldy.

 – Osy jyldar ishinde sizdiń kompanıa munaı-gaz salasyndaǵy iri jobalardy júzege asyrýda Qazaqstannyń senimdi seriktesine aınaldy. Elimizdiń munaı ónerkásibine ozyq tehnologıalardy tartýǵa, kómirtegi beıtaraptyǵyna qol jetkizýge belsendi yqpal etip keledi, – dedi Májilis tóraǵasy.

Erlan Qoshanov eńbek adamyn jan-jaqty qoldaý Memleket basshysy saıasatynyń basym baǵyttarynyń biri ekenin aıta kele, kompanıa tarapynan qazaqstandyq jumysshylarǵa laıyqty jaǵdaı jasaýdyń mańyzdylyǵyna, sonyń ishinde áleýmettik qamsyzdandyrý, ádil eńbekaqy jáne oqytý máselelerine toqtaldy.

 – Búginde elimizde munaı-gaz salasynda biliktiligi joǵary mamandar jetkilikti. Shetelden meńgerip kelgen bilimi men transulttyq kompanıalardaǵy tájirıbesi mol azamattarymyz kóp. Osyǵan baılanysty biz naqty qazaqstandyq mamandardy, onyń ishinde basshylyq qyzmetterge tartýdy usynyp otyrmyz, – dedi Májilis tóraǵasy.

 TSHO basshysy kompanıa qazaqstandyq mamandardyń qataryn arttyrýǵa kúsh salyp jatqanyn aıtty.

  - Búgingi tańda negizgi óndiristi 95 paıyz qazaqstandyq qyzmetkerler quraıdy, onyń ishinde 87 paıyzy jetekshi nemese basshylyq qyzmettegi azamattar, - dedi «Teńizshevroıl» bas dırektory.

 Sondaı-aq Erlan Qoshanov TSHO-nyń Atyraý oblysynyń damýyna úlken úles qosyp otyrǵanyn, túrli áleýmettik jobalardy qarjylandyryp, óńirdiń áleýmettik ınfraqurylymyna ınvestısıa quıyp jatqanyn atap ótti. Ol saılanymnyń basynda Májiliste «Shevron» korporasıasy Eýrazıalyq bólimshesiniń basqarýshy dırektory Derek Magnesspen kezdesý ótkenin eske saldy. Odan keıin taraptar saılaý naýqany kezinde kótergen Jylyoı aýdany, Dossor jáne Qulsary turǵyndarynyń máselelerin talqylady. Spıker TSHO jergilikti turǵyndardyń kótergen máselesine muqıat bolyp, olardy sheshýge bar kúsh-jigerin salýy kerektigin basa aıtty. Bul suraqtar Májilis depýtattarynyń turaqty baqylaýynda. Másele, eń aldymen, aýysym merzimin 28 kúnnen 14 kúnge deıin qysqartý týraly bolyp otyr.

Óz kezeginde TSHO bas dırektory qyzmetkerlerdiń qaýipsizdigi kompanıa saıasatyndaǵy basymdyq bolyp qala beretinin alǵa tartty. Atmosferaǵa shyǵaryndylardy azaıtý, qaldyqtardy tıimdi basqarý jáne qorshaǵan ortany qorǵaý boıynsha ekologıalyq jobalar, sondaı-aq «Igilik» áleýmettik ınfraqurylym baǵdarlamasy aıasynda óńirdi damytý jobalary týraly aıtty.

 – Bıyl biz 75 adamǵa arnalǵan ortalyq aýdandyq aýrýhana, Atyraý qalasynda 300 oryndyq bir mektep jáne Aqqystaý aýylynda 350 oryndyq bir mektepti aıaqtap, tapsyrýdy josparlap otyrmyz. Sonymen qatar Qulsary qalasynda 600 oryndyq mektep, Atyraýda dene shynyqtyrý-saýyqtyrý kesheni, Jylyoı aýdanynda balabaqsha qurylysy jáne Qursaı ózeniniń jaǵalaýyn nyǵaıtý jumystary bastalady, – dedi Kevın Lıon.

Sondaı-aq «Teńizshevroıl» JSHS bas dırektory Jylyoı aýdany turǵyndarynyń ótinishine oraı kompanıa jańa kelisimsharttarǵa aýysym merzimin merdigerlerdiń ózderi anyqtaýǵa múmkindik beretin normany engizýdi josparlap otyrǵanyn jetkizdi.

 Erlan Qoshanov kompanıanyń qazaqstandyq jumysshylarǵa laıyqty jaǵdaı jasaýynyń mańyzdylyǵyn atap ótti. Sonyń ishinde áleýmettik qamsyzdandyrý, ádil eńbekaqy tóleý jáne oqytý sheńberinde.

 Sondaı-aq spıker depýtattyq korpýs pen «Teńizshevroıl» JSHS kiretin áleýmettik-jaýapty kompanıalar arasyndaǵy ózara árekettestik turaqty sıpatqa ıe bolýy qajettigin aıtty. Ol depýtattardyń óńirdiń damýy men eńbek jaǵdaıyna qatysty máselelerdi Parlamenttiń jańa sesıasynda kóterýge nıetti ekenin atap ótti.

 Kezdesýge Qazaqstan tarapynan Májilistiń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan, Atyraý oblysynan saılanǵan depýtat Ádil Jubanov, Ekologıa jáne tabıǵat paıdalaný komıtetiniń múshesi Dúısenbaı Turǵanov qatysty. Delegasıa quramynda «TSHO» JSHS bas dırektorynyń orynbasary Kóńilqosh Súıesinov, Úkimetpen jáne qoǵammen baılanys jónindegi bas menedjer Dármen Aronov jáne múddeli taraptarmen baılanys jónindegi menedjeri Botagóz Qulshaeva boldy.

 Májilistiń Baspasóz qyzmeti